ዘይተነግረ ገድሊ Zeytenegre Gedli [Tigrinya]

By Solomon Berhe

ትረኻታት ሓርነታዊ ቃልሲ ኤርትራ፡ ዝበዝሕ ናብ ፖለቲካውን ወተሃደራውን መዳያት ዘድሃበ እዩ። በዚ ምኽንያት፡ ህዝባዊ ግንባር፡ ብመትከል ርእሰ ምርኰሳ፡ ኣብ ሳሕል ዝመስረቶ ደጀን፡ ነቲ ቃልሲ ኣብ ምዕዋት ዝነበሮ ዓቢ ግደ ዛጊት ከምቲ ዝድለ ኣይተተረኸሉን። "ዘይተነግረ ገድሊ"፡ ንሓደ ክፋል ካብ ዕማማት ደጀን፡ ማለት ንጥፈታት ክፍሊ ማሕበራዊ ጉዳያት እትትርኽ ቀዳመይቲ ቅጺ ናይ ተኸታታሊ መጻሕፍቲ "ተመኩሮ ክፍልታት ሰውራዊ ደጀን ሳሕል" እያ።

ኲናት ዘኸትሎ ማሕበራዊ ሽግራት ማእለያ የብሉን። ቁጠባውን ማሕበራውን ድሕረት ኣብ ዘለዎ ሕብረተሰብ ብፍላይ እቲ ጾር ኣመና ከቢድ'ዩ። ክፍሊ ማሕበራዊ ጉዳያት ህ.ግ.፡ ምስቲ ገዛእቲ ኢትዮጵያ ኣብ ልዕሊ ብረት ዘይዓጠቐ ሰላማዊ ህዝቢ ኤርትራ ዝፍጽምዎ ዝነበሩ ሰፊሕ ግፍዒታት፡ ከምኡ'ውን ከቢድ ሳዕቤናት ኲናት (ስንክልና፡ ምምዝባል፡ ስደት፡ ምብትታን ስድራቤታት፡ ዝኽትምና፡ ደርቂ፡ ጥሜት ወዘተ.) ተኣሳሲሩ፡ ብድሩት ዓቕሚ ውድብ፡ ነቲ ዝነበረ ጥንግናግ ማሕበራዊ ብድሆታት ንምግጣምን ንምቁጽጻርን ኣብ መፋርቕ 1970ታት ዝቘመ ክፍሊ እዩ።

"ዘይተነግረ ገድሊ"፡ ክፍሊ ማሕበራዊ ጉዳያት ነዚ ሰፍ ዘይብል ተልእኾ'ዚ ሒዙ፡ ኣብ መስርሕ ቃልሲ፡ ውዳበኡን ንጥፈታቱን እናስፍሐን እናማዕበለን፡ ከመይ ገይሩ ሓደ ካብ ዓበይቲ ትካላት ሓርነታዊ ቃልሲ ንምዃን ከምዝበቕዐ፡ ነቲ ዝነበረ ብድሆታትን ሕጽረታትን ንምስጋር ዝተራእየ ጻዕርን ምብልሓትን እተዘንቱ እያ። እቶም ትሕዝቶን ዓቕሚን ከይደረተቶም፡ ልዑል ተወፋይነት፡ ኒሕን ሓልዮትን ዓጢቖም፣ ስንኩላን ብጾቶምን ካልኦት ግዳያት ኲናትን ብምሕብሓብ ጥራይ ዘይኮነ ነብሶም ክኢሎም ኣፍረይቲ ክኾኑ ዘኽኣልዎም ኣባላት ክፍሊ ማሕበራዊ ጉዳይ ዘሐልፍዎ ህይወት ኣብዛ መጽሓፍ'ዚኣ ብስፍሓት ተተሪኹ ኣሎ።

• Format: Paperback
• Language: Tigrinya
• ISBN: 9994801813
• ISBN13: 9789994801817
• Release Date: January 2025
• Publisher: Hdri Publishing
• Length: 576 Pages
• Weight: 1.75 lbs.
• Dimensions: 1.2" x 6.1" x 9.2"